Bāc! Nazi bārza stumbrā ītrīc! Soldona sula cauri pierkstim tovim tak.
Paukš-pa-paukš. Luosi piec luosis Pylna burka bārza sulys pīsalosa.
Kod pavasarī zemis spāks Pa stumbru augšā ceļās, Lai liktiņa kūks Varēt’ zaļumot i plaukt. Kaids naapdūmeigs cylvāks Soltu asmini leidz spolam Boltā kūka mīsā trīc.
Vīns mirklis – i rāta dziļa grīzta! Leidz pošam kūka vydam Svešs ķermins īkšā trīcās. Mirkli apsastuoj, I lānai uorā īt.
Līkās – kas gon taids nūtics!? Malni-boltā stumbrā vīns Nalels skruopejums vairuok.
Tikai soldonais škidrums Iz augšu vairs naīt. Tys iztak nu myzys kai osorys – Ar liktini i sovu dzeivis suopi.
Kūks tikai rauduot i zorus Leidza viejam lūcēt var. Žāluma saucīni izkuss Apkuortejā šalkūnī.
I nasadzierdēs cylvāks, Ka blokus augūšais kūks, Klusai lyudzās i prosa Pažāluot jel tū. Par tū rāta, kas reiz grīzta, Vairs nasadzeis nikod, Tei muižam osoruos I korstu suopi sevī ness.
Dzeive cīta kai sašyuta rāta, Saauguse un nasuop. Bet zam tuos, dzili zam tuos – Muna svātdina suop.
Muola krūze pīsmalta Leidz molom sulys pylna. Ar spāku, kū zeme kūkam deve I kū cylvāks pacīteigi tacynuoj uorā.
Dzer saimnīks tū Leidz dybynam tukšu. Vīns mirklis – I sluopis jau jys kaltej.
Skaļš saucīns nu kryutem izalauž I skaņ puori teirumim, Puor tāvzemis pļavom i zaļajim mežim. Kai pateiceiba zemei Par dzeiveibu, kū apkuort roda tei!
Tikai bārzu birzeite Vēļ klusuoka topuse. Nav tai vairs spāka Ni rauduot, ni klīgt.
Kod cytreiz garom goduos īt, Var dzierdēt, kai bārzi caur vieju Klusu lyugšonu čukst.
„Cylvāk, apsastuoj! I apsaver apkuort. Nūlīc nazi! I nagrīz cytim vairs – Tok suop i rāta dziļa palīk!
Cylvāk, pīsēd munā ānā Korstā vosorys dīnā. Īsaklaus tod šalkūnī, Kū bruoli apkuort runoj. Dzierdi, cik skaistai! Ni skrīt, ni grīzt, Bet zemis spāku caur pošu dobu jimt!
Cylvāk, nuoc pi manis leitā, Pīkļauņ sovu golvu I ļaunīs, lai leita luosis Mozgoj pīri tovu teiru.
Tikai najam leidza nazi I nagrīz mani vairs!
Cylvāk, voi tys tik gryutai?”
Dzeive cīta kai sašyuta rāta, Saauguse un nasuop. Bet zam tuos, dzili zam tuos – Muna svātdina suop.
|